الشهداء الابطال بدلوا ثوب العيد بكفن. // أحمد القضاه
يمكن الصبح قبل ما يطلع من البيت، وقف ابنه على باب الغرفة وهو بعده نعسان وقله:
“بابا… بكرا العيد… بدنا نروح نشتري اواعي للعيد صح؟”
ابتسم الأب وقله ان شاء الله لما اروح بنروح على السوق وبنشتري .
زي كل الآباء… لما يحاولوا يزرعوا الطمأنينة بقلب أولادهم، حتى لو كانوا طالعين على طريق ما بعرفوا إذا راح يرجعوا منه او لا .
لبس بدلته… وطلع.
ما كان طالع يدور على بطولة…كان طالع يعمل شغله ويقوم بواجبه .
الملازم أول #مراد_المواجدة
والرقيب #خلدون_الرقب
والعريف #صبحي_دويكات
ثلاثة رجال من هالبلد…
ثلاثة آباء…ثلاثة بيوت كان فيها أطفال بستنوهم يرجعوا.
ترتبيات العيد خربت ؟
بدل فرحة العيد صارت حزن العيد
طلعوا يواجهوا احقر واقذر فئة وأخطر حرب قاعدين بنعيشها حرب المخدرات.
هاي السموم اللي بتسرق شبابنا، وبتكسر بيوت، وبتدمر عقول.
ولما وصلوا لمداهمة المطلوب…
المجرم الحقير ما فكر لا بأب ولا بطفل ولا بوطن…فتح النار.
الرصاص ما اخترق صدور ثلاثة رجال بس…الـرصاص دخل ثلاث بيوت. دخل على قلوب أطفال كانوا بستنوا بابا يرجع.
بهاللحظة، يمكن في طفل من أولادهم لسه بسأل:
“ماما… متى رح يرجع بابا؟”
كيف ممكن أم تجاوب؟
كيف ممكن تحكي لطفل إنه أبوه ما رح يرجع…لأنه كان واقف يحمي أولاد الناس كلهم؟
كيف ممكن يتغير ترتيب البيت من استقبال العيلة للمة وضحكة العيد الى بيت عزاء..؟
ملابس العيد اللي وعدوا فيها أولادهم… ما رح تنشرى.
أطفال كانوا بعدوا الدقايق حتى يرجع بابا…صاروا فجأة أيتام.
هيك يُدفع ثمن الأمن..
في الوقت اللي فيه ناس قاعدين خلف الشاشات بتفلسفوا عن الوطن…
كان في رجال بكتبوا معنى الوطن بدمهم.
الوطن مش حكي.
الوطن أب يطلع من بيته…
ويمكن ما يرجع.
الوطن طفل يستنى ابوه…
وما يعرف إنه وعد ملابس العيد كان آخر وعد منه.
وهون لازم تنقال كلمة موجعة…
إذا ما تم تجفيف منابع هالسم…
رح نظل نفقد خيرة شبابنا واحد ورا الثاني.
لأنه المخدرات ما بتقتل بس اللي بتعاطاها…
هي بتقتل مجتمع كامل.
رحم الله
مراد المواجدة
خلدون الرقب
صبحي دويكات
ثلاثة أسماء…
لكن خلف كل اسم بيت كامل انكسر اليوم. وللي لسه مش عاجبه هالبلد…
تذكروا بس شغلة وحدة:
في رجال تركوا أولادهم أيتام…
عشان أولادكم ما يصيروا ضحايا المخدرات..
استبدلوا ملابس العيد بكفن الشهادة فداءا للوطن ..
الله يرحمهم…
ويجعل دمهم أمان لهالبلد.
وإنا لله وإنا إليه راجعون.
انا مواطن وعدو كل تاجر حقير